یہ بتانِ شب کی حکومتیں یہ ریاستوں کی قیادتیں ۔ فاروق درویش

  یہ بُتانِ شب کی حکومتیں ، یہ ریاستوں کی قیادتیں
صفِ دشمناں کی رفاقتیں ہیں کہ دیر و دہر کی مورتیں

  نہ مکاں ملا نہ کفن سلا، بنے فاقہ کش ہیں اسیرِشب
ہوئے بے لباس جو بت شکن، ملیں بت فروشوں کو خلعتیں

  کہیں بک گئی یہاں منصفی، کہیں سوئے دار چلی خودی
کہیں زر خریدوں کے فیصلے کہیں اندھی بہری عدالتیں

  کبھی قتل عام  ہے صبح کا، کبھی شب تماشہء حشر ہے
ہوئیں زرد شامیں لہو لہو کہ ہیں دشتِ غم کی مسافتیں

  سوئے حشر روتے ہیں ادھ کھلے سے گلاب مرگ ِ بہار پر
کہ کفن میں لپٹے ہیں گلبدن، دمِ غسل اتریں قیامتیں

فاروق درویش

۔۔

بحر : بحرِ کامل مثمن سالم

ارکان : متفاعلن ۔۔ متفاعلن ۔۔۔ متفاعلن ۔۔۔ متفاعلن
اوزان : 21211 ۔۔ 21211 ۔۔۔ 21211 ۔۔ 21211

اشاراتِ تقطیع

یہ ۔۔ ب ۔۔۔ تا ۔۔ نے ۔۔۔ شب ۔۔۔ 21211
کی۔۔۔ ح ۔۔۔۔ کو ۔۔۔ م ۔۔۔ تیں ۔۔ 21211
یہ ۔۔۔ ر۔۔۔۔ یا ۔۔۔ س ۔۔۔۔ توں ۔۔ 21211
کی ۔۔۔ ق ۔۔۔ یا ۔۔۔ د ۔۔۔ تیں ۔۔۔ 21211

ص ۔۔ فے ۔۔۔ دش ۔۔۔ م ۔۔۔ ناں ۔۔ 21211
کی ۔۔۔۔ ر۔۔۔ فا ۔۔۔ ق ۔۔۔ تیں ۔۔۔ 21211
ہیں ۔۔۔ کہ ۔۔۔ دی ۔۔۔ رو ۔۔ دہ ۔۔۔ 21211
ر ۔۔۔ کی ۔۔۔۔ مو ۔۔۔ ر ۔۔۔ تیں ۔۔۔ 21211

یہ بظاہر آسان نظر آنے والی ایک مشکل بحر ہے کیونکہ اس میں ہر مصرع میں چار بار ایک ہی رکن متفاعلن ( 21211) کی تکرار کے باعث ہر بار اغازِ رکن میں دو یک حرفی ( 1.1) ہے۔ سو ایسے میں رواں مصرع باندھنا  آسان نہیں ہوتا لیکن جب مشق کے بعد اس کے اوزان کی سمجھ اور الفاظ کے چناؤ پر دسترس حاصل ہو جائے تو بڑے مترنم اشعار تخلیق ہوتے ہیں ۔ اپنے ناقص علم کے مطابق کچھ اشارات پیش کرتا ہوں امید ہے کہ نئے لکھنے والوں کیلئے مددگار ثابت ہوں گے

یاد رکھیں کہ یہ بحر ہو یا کوئی اور بحر، جہاں بھی مسلسل دو یک حرفی یعنی 1+1 موجود ہوں وہاں بیشمار الفاظ باندھے جا سکتے ہیں جیسے کہ ۔۔۔ دو اکہرے الفاظ ۔۔۔ یہ کہ ۔۔۔ وہ تو ۔۔۔ نہ ہے ۔۔ نہ یہ ۔۔۔ یا دو اکہری آوازیں رکھنے والا ایک لفظ جیسے ۔۔۔ مرا ۔۔۔ ترا ۔۔۔مرے ۔۔۔ ترے ۔۔۔ کِیا ۔۔۔ ہوا ۔۔۔ ہوئے ۔۔۔۔ سوئے ۔۔۔ کبھی ۔۔۔ ابھی ۔۔۔۔ سبھی ۔۔۔۔ کسی ۔۔۔ کوئی ۔۔۔۔ نہیں ۔۔۔ کہیں ۔۔۔ وہیں ۔۔۔ یہیں ۔۔۔ پس ِ ( پسے) ۔۔۔ سر ِ ( سرے) ۔۔ کف ِ ( کفے) ۔۔۔ در ِ ( درے) ۔۔۔ صف ِ (صفے) ۔۔۔ دم ِ (دمے ) یا پہلے یک رکنی لے مقام پر کوئی یک رکنی لفظ کے بعد دوسرے یک رکنی وزن کو اگلے دو رکنی وزن سے بھی جوڑا جا سکتا ہے ۔ جیسے۔۔۔ ایک متفاعلن ( 21211) میں پس ِ مرگ میں ۔۔۔ دم ِ وصل تو ۔۔ سوئے حشر ہم ۔۔۔ بھی باندھا جا سکتا ہے ( اس غزل میں اس کی مثال صف ِ دشمناں اور کہیں بک گئی ) ہے اور ۔۔ میں یہاں وہاں ۔۔۔ تو کہیں نہیں ۔۔۔۔ وہ مرا خدا ۔۔۔ نہ کوئی مرا ۔۔ یہ ترا سخن ۔۔ جیسے الفاظ کی بھی ترتیب ممکن ہے ، اوپر غزل میں اس کی مثال ( نہ مکاں ملا ) ہے

“کیا” اور “کیوں” کو دو حرفی یعنی “کا” اور “کوں ” کے وزن پر باندھا جائے گا ۔ کہ، ہے، ہیں، میں، وہ، جو، تھا، تھے، کو، کے ، تے ، رے اور ء جیسے الفاظ دو حرفی وزن پر بھی درست ہیں اور انہیں ایک حرفی وزن میں باندھنا بھی درست ہیں ۔ لہذا ان جیسے الفاظ کیلئے مصرع میں ان کے مقام پر بحر میں جس وزن کی سہولت دستیاب ہو وہ درست ہو گا ۔

ایسے ہی “ے” یا “ی” یا “ہ” پر ختم ہونے والے الفاظ کے ان اختتامی حروف کو گرایا جا سکتا ہے ۔ یعنی جن الفاظ کے آخر میں جے ، گے، سے، کھے، دے، کھی، نی، تی، جہ، طہ، رہ وغیرہ ہو ان میں ے، ی یا ہ کو گرا کر انہیں یک حرفی وزن پر باندھنا بھی درست ہو گا اور اگر دوحرفی وزن دستیاب ہو تو دو حرفی وزن پر بھی باندھا جا سکتا ہے۔

اسی طرح جس اسی طرح اگر کسی لفظ ے اختتامی حرف کے نیچے زیر ہو اسے دو حرفی وزن پر بھی باندھا جا سکتا ہے اور یک حرفی وزن پر بھی باندھا جا سکتا ہے۔ ( مثال : دشت یا وصال کے ت یا لام کے نیچے زیر کی صورت میں انہیں دشتے اور وصالے پڑھا جائے گا ۔ ایسے الفاظ کی اختتامی ت یا لام کو بحر میں دستیاب وزن کے مطابق یک حرفی یا دو حرفی باندھنے کی دونوں صورتیں درست ہوں گی ) ۔

تقطیع کرتے ہوئے یہ بات دھیان میں رہے کہ نون غنہ اور ھ تقطیع میں شمار نہیں کئے جائیں گے یعنی تقطیع کرتے ہوئے ، صحراؤں کو صحراؤ ، میاں کو میا، خوں کو خو، کہیں کو کہی ۔ پتھر کو پتر اور چھیڑے کو چیڑے پڑھا جائے گا

تحریر فاروق درویش